اے خدا! سارے جہاں کو ہے بنایا تو نے
اے خدا! سارے جہاں کو ہے بنایا تو نے
پھول کلیوں سے اِسے خوب سجا یا تو نے
اپنی قدرت کے مظاہر سے زمیں کو ڈھانپا
اِس میں پھر لاکھوں خزانوں کو چھپایا تو نے
نام بھی تیرا نہ آتا تھا ، خدایا ہم کو
عقل دی اور ہمیں خود ہی سکھایا تو نے
مانگتا جائوں گا جب تک نہ بھرے گی جھولی
؎’’ہو نہ مایوس‘‘ کا مژدہ ہے سنایا تو نے
پھر رہے تھے جو بھٹکتے ہوئے تاریکی میں
راستہ اُن کو اجالوں کا دکھایا تو نے
شکر بس تیرا ادا کرتا رہے یہ آصف
جس کو محتاج فقط اپنا بنایا تو نے