اے ربِّ سمٰوات تیری ذات درا ہے
اے ربِّ سمٰوات تیری ذات درا ہے
ہیبت سے تیری کوہِ گراں کانپ رہا ہے
ہیں خالقِ کونین ترے کام نِرالے !
بے رنگ ہے تو ایسا کہ ہر رنگ تِرا ہے
اِنسان بیچارہ تجھے کیا جان سکے گا
اِدراک کی دنیا میں تجھے ڈھونڈرہا ہے
بے تاب فغاں ‘ سوزِ نہاں ‘ اشکِ رواں میں
جلوہ تِرا جِس رنگ میں ہے ہوشرُبا ہے
باقی ہے تو ایسا کہ بقا تیری ہے تخلیق
خود پیکرِ فانی میں کہیں جا کے چھُپا ہے
ہر سجدہ ہے اعلان کہ اعلیٰ ہے تو ربّی !
مسجُودِ ملائک ہے جو سجدے میں گِرا ہے
حادِث تجھے کیا سمجھے کہ تُو حُسنِ قِدم ہے
حادث کی زباں سے ہی تِرا نام سُنا ہے
ہیں تیرے ہی انداز غریبی و امیری
دیتا ہے کبھی اور کبھی مانگ رہا ہے
میں نے بھی تجھے دیکھا ہے کب یاد نہیں ہے
بھُولا ہوں میں خود کو کہ تجھے یاد کِیا ہے
تیرے ہی تصوّر میں ہوا گُم تو یہ سمجھا
جِس نے تجھے پایا ہے وہ کھویا گیا ہے
یہ زیست شبِ غم ہے کہ مر مر کے کٹی ہے
لے لے کے تِرا نام یہ غم دُور ہُوا ہے
معلوم ہے اِتنا کہ ہمیں کچھ نہیں معلوم !
جانا ہے کہ کیا جانے گا جو جان گیا ہے
ہر سمت ہے وَجہُ اللہ عیاں خالقِ احسن
خود آئینہ خود دیدہء حیران ہوا ہے