جد اللہ دا نام چتاراں
جد اللہ دا نام چتاراں
اون خیالاں وچ بہاراں
اُوہ آکھے میں دُور نہیں تیتھوں
جد وی مالک نو ں سد ماراں
ہر مشکل وچ، ہر الجھن وچ
اوہو لیندا میریاں ساراں
اوہدے لُطفوں ہرے بھرے نیں
بیلے باراں تے گلزاراں
دھرتی دے سینے ٹھنڈ پاون
اوسے دیّاں فضل پھواراں
اوہدے حکماں نال ای ہوندیاں
زیویں وچوں پیداواراں
پوٹاں بھردا سب پکھواں دیاں
جیہڑے اڈدے بن بن ڈاراں
اوہدے قہر دی جھلک وکھاون
برق دیاں کڑکاں چمکاراں
تائبؔ اڈّاں کتھے کتھے
اوہدیاں شاناں جدوں چتاراں