خدائے کون و مکاں سب کا پاسباں تُو ہے
کریم و رازق و خلّاقِ اِنس و جاں تُو ہے
ہر ایک شے میں ، ہر اک رُوح میں رواں تُو ہے
وہاں خرد کی رسائی نہیں ، جہاں تُو ہے
ازل سے خاص حجابوں کے درمیاں تُو ہے
کوئی بتا نہ سکے گا کبھی ، کہاں تُو ہے
روش روش تِرے حُسن و جمال سے روشن
چمن میں رنگِ گُل و لالہ سے عیاں تُو ہے
جگہ جگہ تِری موجودگی کی آئنہ دار
ہر ایک سُو تِرے جلوے ، یہاں وہاں تُو ہے
زباں زباں پہ ہے دن رات داستاں تیری
نظر سے دُور سہی ، سب کے درمیاں تُو ہے
خَفی ہے ذات تِری ، ہے جَلی تِری قدرت
جہاں میں برتر از اندیشہ و گُماں تُو ہے
عجب ہے تیرے جمال و جلال کا عالَم
ہر ایک موج میں ، ہر برق میں رواں تُو ہے
ہر ایک شے سے جھلکتی ہے تیری زیبائی
عیاں شعور پہ ہے ، آنکھ سے نہاں تُو ہے
تِری ادائے کرم کی ہر اک شے مرہون
ہر اک وجود کے پیکر میں ضَو فشاں تُو ہے
ہُوا ہے حمد سرا ربِّ دو جہاں کے لئے
نصیؔر ! آج خود اپنے پہ مہرباں تُو ہے