موجود بہر سمت ہے اک ذاتِ الٰہی
موجود بہر سمت ہے اک ذاتِ الٰہی
دیتی ہیں گواہی یہی آیاتِ الٰہی
اجرامِ فلک ہوں کہ نباتات و جمادات
ہر چیز سمجھتی ہے اشاراتِ الٰہی
جتنے بھی کرشمے نظر آتے ہیں نمو کے
ہر آن کیے دیتے ہیں اثباتِ الٰہی
انساں کے حواس اُس کے ہی ارشاد سے قائم
گھیرے ہیں خلائق کو عنایاتِ الٰہی
آفاق در آفاق ہیں انوار اُسی کے
امکان در امکان نشاناتِ الٰہی
پابند عناصر ہیں اُسی ذات کے تائبؔ
فطرت میں بھی جاری ہیں ہدایات الٰہی