تُو ایک قلزمِ رحمت وسیع و بے پایاں
تُو ایک قلزمِ رحمت وسیع و بے پایاں
مَیں ریگ زارِ تمنّا میں تشنہِ باراں!
تِرا جمال کہ ہے کائنات کی تنویر !
مَیں اِک مسافرِ شب تیرگی میں سرگرداں
تُو ایک راز کہ ظاہر بھی ہو تو پُر اسرار،
میں تیرے راز کا محرم میں تیرے فن کا نِشاں
تُو سامنے ہو تو چھِن جائے تابِ نظّارہ
مَیں آئینے میں ہوں گُم مِثلِ دیدہء حیراں
تُو لا مکاں کا مکیں اپنی ذا ت میں تنہا!
مری شریکِ سفر کیوں ہو گردشِ دوراں
تُو وہ کہ نُور سے تیرے ضیائے ارض و سماء
مَیں تِیرہ شب میں تمنائے روزنِ زنداں
تُو خود قریبِ رگِ جاں رہے تو بات الگ
مَیں دورئ شبِ ہجراں میں شورش ِ گریاں
تُو ایک برقِ تجلّی کہ ھر وجود میں تُو !
مَیں ایک سنگ کہ اپنے وجود میں لرزاں
تُو وہ قدیم کہ آغاز ہے نہ ہَے انجام ،
مَیں وہ کہ حادث و فانی و بے خبر انساں
تُو ہر خیال کی رفعت سے ارفع و اعلیٰ!
مَیں لاؤں کو نسے الفاظ شان کے شایاں
تُو آسکے تو مرے غم کے کائنات میں آ
مَیں آگیا تیری چاہت میں اب کہاں سے کہاں
عجب نہیں تُو مرے غمکدے میں آجائے
عجب نہیں کہ مرے درد کو ملے درماں!
بجا کہ لُطف و کرم بے کَنار ہے تیرا !
بجا کہ مُجھ کو ہَے احساسِ تنگیِّ داماں !
نگاہِ فکر سے پردے اُٹھا مرے مولا ،
سرِ فلک بھی دھواں ہے سرِ نظر بھی دھواں
تجھے ہَے واسطہ تیری بقائے مُطلق کا ،
مرے وطن کی بقا کا بھی کچھ تو ہو ساماں !
تُو ہی بتا کہ تُجھے کیا کہے ترا واصؔف !
ملے زبان کو دِل ، یا عطا ہو دل کو زباں !