باغِ جنّت کے ہیں بہرِ مدح خوانِ اہلبیت
باغِ جنّت کے ہیں بہرِ مدح خوانِ اہلبیت
تم کو مُژدہ نار کا اے دُشمنانِ اہلبیت
کس زباں سے ہو بیانِ عِزّو شانِ اہلبیت
مدح خوانِ مصطفےٰؐ ہے مدح خوانِ اہلبیت
ان کی پاکی کا خُدائے پاک کرتا ہے بیاں
آیہء تطہیر سے ظاہر ہے شانِ اہلیبت
مصطفےٰؐ عِزّت بڑھانے کے لئے تعظیم دیں
ہے بلند اقبال تیرا ‘ دردمانِ اہلِبیت
ان کے گھر میں بے اجازت جبرائیل آتے نہیں
قدر والے جانتے ہیں قدر و شانِ اہلبیت
رزم کا میداں بنا ہے جلوہ گاہِ حُسن و عشق
کربلا میں ہو رہا ہے امتحانِ اہلبیت
حوریں کرتی ہیں عروسانِ شہادت کا سنگھار
حُو برو دولھا بنا ہے ہر جوانِ اہلبیت
جمعے کا دن ہے کتابیں ریست کی طے کر کے آج
کھیلتے ہیں جان پر شہزادگانِ اہلبیت
اے شَبابِ فصلِ گُل یہ چل گئی کیسی ہَوا
کٹ رہا ہے لہلہاتا بوستانِ اہلبیت
کس شقی کی ہے حکومت ہائے کیا اندھیر ہے
دن دہاڑے لُٹ رہا ہے کاروانِ اہلبیت
خشک ہو جا خاک ہو کر خاک میں مل جا فرات
خاک تجھ پر دیکھ تو سُوکھی زبانِ اہلبیت
تیری قدرت جانور تک آب سے سیراب ہوں
پیاس کی شِدّت سے تڑپے بیزبانِ اہلبیت
فاطمہ کے لاڈلے کا آخری دیدار ہے
حشر کا ہنگامہ برپا ہے میانِ اہلبیت
وقتِ رُخصت کہہ رہا ہے خاک میں ملتا سہاگ
لو سَلامِ آخری اے بیوگانِ اہلِبیت
کس مزے کی لذّتیں ہیں آبِ تیغِ یار میں
خاک و خوں میں لوٹتے ہیں تشنگانِ اہلبیت
باغِ جنت چھوڑ کر آئے ہیں محبوبِؐ خدا
اے زہے قسمت تمہاری کشتگانِ اہلبیت
گھر لُٹانا جان دینا کوئی تجھ سے سیکھ جائے
جانِ عالم ہو فدا اے کاروانِ اہلبیت
دولتِ دیدار پائی پاک جانیں بیچ کر
کربلا میں خوب ہی چمکی دُکانِ اہلبیت
زخم کھانے کو تو آبِ تیغ پینے کو دیا
خوب دعوت کی بلا کر دشمنانِ اہلبیت
اہلِ بیتِ پاک سے گُستا خیاں بے باکیاں
لَعنتُہ اللہِ علیکم دشمنانِ اہلبیت
بے اَدب گُستاخ فرقے کو سنا دے اے حسنؔ
یُوں کہا کرتے ہیں سنّی داستانِ اہلبیت