بس رہی ہے فضاؤں میں خوشبو
پھر کھنکنے لگے ہیں جام و سبُو !
سوزِ دل سے چراغ جلتا ہَے
درد غربت کدے میں پلتا ہے
اُن کا فیضِ نظر ملا ہَے مجھے
اُن کی شفقت کا آسرا ہے مُجھے
اُن کی مدحت مری مجال نہیں
ہے اُنہی کا ، مرا کمال نہیں
اُن کے سائے سے پیار کرتا ہوں
جان اُن پر نثار کر تا ہوں
جن کی ہیبت سے سرنگوں اصنام
وہی مولا امامِ علی مقام
وجہءِ عرفانِ اولیا ئے جہاں
زد میں ہیں جن کی لامکان و مکاں
نام جن کا علی ؑ اسد اللہ
جن کا چہرہ بنا ہے وجہ اللہ
سوزو ساز و سُخن علی ؑ مولا !
سایہء ذو المنن علی ؑ مولا
ردِّ رنج و محن، علی ؑ مولا!
زینتِ انجمن ، علی ؑ مولا
میرے من کی لگن علی ؑ مولا!
رازِ خیبر شِکن ، علی ؑ مولا !
سرِّ سرِّ نہاں علی ؑ مولا!
بے نشاں را نشاں علی ؑ مولا !
رھبرِ انس و جاں علی ؑ مولا
بابِ علم ِ رواں علی ؑ مولا
فخرِ ختمِ رُسل ، علی ؑ مولا
آفتاب سبل علیؑ مولا !
شیرِ یزداں علی ؑ ولی اللہ
شاہ مرداں علی ؑ ولی اللہ
لا فتٰی بر ملا علی حیدرؑ
ساقئ میکدہ علی حیدرؑ
ہیں نگاہِ رُسولؐ کے مقبُول !
وارثِ دین ِ حق پناہِ بتول
فیض اُن کی نظر سے ملتا ہے
کب اِدھر یا اُدھر سے ملتا ہے !
مَیں نے جب بھی اُنہیں پکارا ہے
اِک صَدا آئی تُو ہمارا ہے
فیضِ عالم ہیں مظہرِ انور
اُن کے صدقے میں ہوگا بیڑا پار