ہُوئے ہیں دیدہ و دل محوِ شانِ گنجِ شکرؒ
زہے نصیب ، مِلا آستانِ گنجِ شکرؒ
وہ بِھیڑ دیکھئے ، وہ آستانِ گنجِ شکرؒ
نظر کے سامنے ہیں ، زائرانِ گنجِ شکرؒ
فلک پہ اوجِ ثُریّا ، نشانِ گنجِ شکرؒ
کُل اولیا میں نرالی ہے شانِ گنجِ شکرؒ
مجھے ہی فخر نہیں ہے نیاز مندی کا
ہیں سارے جنّ و ملک ، مدح خوانِ گنجِ شکرؒ
سدا بہار ہیں اِس کے تمام غُنچہ و گُل
خزاں کی زد میں نہیں ، گُلستانِ گنجِ شکرؒ
مٹھاس شہد کی ایک ایک حرف میں اُن کے
نَبات و قند سے شیریں ، زبانِ گنجِ شکرؒ
عجیب بھِیڑ ہے قصرِ جناں پہ حشر نُما
جدھر بھی دیکھو، اُدھر عاشقانِ گنجِ شکرؒ
لطیف تر ہیں عُروج و نُزول کی باتیں
سُنائے جائے کوئی، داستانِ گنجِ شکرؒ
حُصولِ قُربِ الہٰی تھی منزلِ مقصود
رُکا نہ اور کہیں ، کاروانِ گنجِ شکرؒ
اِنہِیں کے باغ کے گُل ، صابرؒ و نظامُ الدّیں ؒ
بسے ہیں دل میں مِرے ، دلبرانِ گنجِ شکرؒ
جواِن کے دوست ہیں وہ سُرخرو جہاں میں ہیں
ذلیل و خوار ہُوئے ، دُشمنانِ گنجِ شکرؒ
جدھر بھی دیکھئے ، ہے سامنے تجلّیِ ذات
جہانِ طُور ہے یکسر ، جہانِ گنجِ شکرؒ
نصیؔر! اپنی سی کوشش قلم نے کی ، لیکن
تمام ہو نہ سکی ، داستانِ گنجِ شکرؒ