ختم الرّسُل ہیں نُورِ نظر جانِ آمنہ
ہم ہیں بہ صد خلوص ، ثنا خوانِ آمنہؒ
رُتبہ بُلند ، اور بڑی شانِ آمنہؒ
دُنیا کی ساری مائیں ہیں ، قُربانِ آمنہؒ
ہم کو مِلے رسوؐلِ خدا اِن کی گود سے
اُمّت پہ ہے یہ شفقت و احسانِ آمنہؒ
شاہِ عربؐ کی والدہء ماجدہ ہیں آپ
اللہ رے یہ مرتبہ و شانِ آمنہ ؒ
دونوں جہان جس کی ضیا سے ہیں فیض یاب
و ہ نُورِ حق ہے ، مہرِ درخشانِ آمنہؒ
تخلیقِ کائنات کا باعث ، رسوؐل ہیں
لکّھا گیا یہ باب، بعنوانِ آمنہؒ
اُن کی نوازشات ہیں میری نگاہ میں
مَیں ہُوں نصیؔر! دل سے ادب دانِ آمنہ ؒ