واجاں پئی مار دی اے سخاوت فرید دی
لٹ کئو فریدی منگتیو دولت فرید دی
تسلیم کیتی ولیاں نے عظمت فرید دی
کم آ گئی جہان دے سنگت فرید دی
اوندے نے نعرے مار دے حق یا فرید دے
چڑھ گئی اے جہناں جہناں نوں رنگت فرید دی
دیوانے وار چھڈ دے نے ہر چیز پیر توں
کردا ہاں صفت جد وی میں حضرت فرید دی
کرنے ہاں رشک ایس لئی اپنے نصیب تے
سانوں ملی اے دنیا تے نسبت فرید دی
میں کیہڑی کیہڑی صفت سناواں فرید دی
بن منگیاں جھولی بھرناں ایں عادت فرید دی
کوئی وی سوہنا جچدا نئیں میری نگاہ وچ
دیکھی اے جیہڑے دن توں میں صورت فرید دی
جھولی میری وی اپنے کرم نال بھر دیو
سن کے میں آیاں دور توں شہرت فرید دی
تن من فدا کرو تسیں اس خوش نصیب توں
جس دل دے وچہ وی دیکھو محبت فرید دی
کردا ہاں جو ثنائے محمد ﷺ میں رات دن
رحمت خدا دی ہے تے عنایت فرید دی
دنیا توں میں نہیں منگدا دنیا دی کوئی شے
مینوں نیازی کافی اے الفت فرید دی