ابنِ یعقوبؐ کو اللہ نے صورت بخشی
ید بیضیٰ کی کلیم اللہ کو نعمت بخشی
اور عیؑسیٰ کو مسیحائی کی دولت بخشی
ہر نبی کو کوئی عزّت کوئی عظمت بخشی
میری سرکار کو بے پردہ زیارت بخشی
اہلِ دنیا کو زرو مالِ سکندر بخشا
اہل دیں کو درجنّت سرِ کوثر بخشا
درد والوں کو خدا نے دلِ مضطر بخشا
ہر طلب گار کو ہر قسم کا گوہر بخشا
میرے آقا کو دو عالم کی حکومت بخشی
رونق اس باغ میں آئی تو انھیں کے دم سے
بات آدم کی بن آئی تو انھیں کے دم سے
ہُوئی یونس کی رہائی تو انھیں کے دم سے
اور اماں نوحؑ نے پائی تو انھیں کے دم سے
حق نے سرکارِ دوعالم کو وہ قدرت بخشی
کوئی آجائے طلب سے بھی سوا دیتے ہیں
آئے بیمار تو ہر دکھ کی دوا دیتے ہیں
گالیاں دیتا ہو کوئی تو دعا دیتے ہیں
دشمن آجائے تو چادر بھی بچھا دیتے ہیں
اعظؔم اللہ نے حضرت کو وہ سیرت بخشی