کہکشاں کہکشاں آپ کی رہگذر
منزلوں کا نشاں آپ کی رہگذر
سوئے منزل رواں کارواں کارواں
عظمتوں کا نشاں آپ کی رہگذر
راہبر ہو گئے آپ کے رہ نشیں
رہبرِ رہبراں آپ کی رہگذر
آپ کی زندگی شرحِ قرآن ہے
جادۂ جاوداں آپ کی رہگذر
آپ کے خُلق سے نفرتیں مٹ گئیں
الفتوں کا بیاں آپ کی رہگذر
حسنِ خیرِ عمل، خیرِ دنیا و دیں
دل بہ دل جاں بہ جاں آپ کی رہگذر
حسنِ افکار سے حسنِ کردار تک
ذی شرَف، ضو فشاں آپ کی رہگذر
ظلم، جور و جفا امن میں ڈھل گئے
امن کا سائباں آپ کی رہگذر
نوع انساں ہوئی پھر بہار آشنا
گل فشاں گل فشاں آپ کی رہگذر
عہدِ بے نور میں شب زدوں کے لیے
روشنی کا جہاں آپ کی رہگذر
سر کے بل ہے رواں نورئ نیم جاں
محورِ قلب و جاں آپ کی رہگذر