آج ہیں ہر جگہ عاشِقانِ رسول
آج ہیں ہر جگہ عاشِقانِ رسول
محوِ نعت و ثنا عاشِقانِ رسول
جشن، میلاد کا سب رہے ہیں منا
بندگانِ خدا عاشِقانِ رسول
جشنِ میلاد سے عشق ہے پیار ہے
ہیں مناتے سدا عاشِقانِ رسول
ماہِ میلاد میں خوب لہرایئے
گھر پہ جھنڈا ہرا عاشِقانِ رسول
آمدِ مصطَفٰے مرحبا مرحبا
سب لگاؤ صدا عاشِقانِ رسول
سیکھنے سنّتیں، مسجد آؤ چلیں
لائے ہیں قافِلہ عاشِقانِ رسول
یاد رکھنا سبھی چھوڑنا مت کبھی
دامنِ مصطَفٰے عاشِقانِ رسول
رحمتِ کبریا تم پہ ہو دائما
ہے ہماری دعا عاشِقانِ رسول
تم پہ فضلِ خدا،رحمتِ مصطَفٰے
ہو بروزِ جزا عاشِقانِ رسول
کاش! دنیا میں تم دو بَفَضلِ خدا
دیں کا ڈنکا بجا عاشِقانِ رسول
تم پہ ہو قبر میں ہر جگہ حشر میں
سایۂ مصطَفٰے عاشِقانِ رسول
بے نمازی رہیں کچھ نہ روزے رکھیں
اُن کو کس نے کہا؟ عاشِقانِ رسول
عالموں پر ہنسیں ،پَھبتیاں بھی کَسَیں
اُن کو کس نے کہا؟ عاشِقانِ رسول
جو کہ گانے سنیں، فلم بِینی کریں
اُن کو کس نے کہا؟ عاشِقانِ رسول
بد نگاہی کریں، بد کلامی کریں
اُن کو کس نے کہا؟ عاشِقانِ رسول
کھائیں رزقِ حرام، ایسے ہیں بد لگام
اُن کو کس نے کہا؟ عاشِقانِ رسول
عَہد توڑا کریں ، جھوٹ بولا کریں
اُن کو کس نے کہا؟ عاشِقانِ رسول
جو ستاتے رہیں دل دُکھاتے رہیں
اُن کو کس نے کہا؟ عاشِقانِ رسول
چغلیوں تہمتوں، میں جو مشغول ہوں
اُن کو کس نے کہا؟ عاشِقانِ رسول
گالیاں جو بکیں عیب دریاں کریں
اُن کو کس نے کہا؟ عاشِقانِ رسول
داڑھیاں جو مُنڈائیں کریں غیبتیں
اُن کو کس نے کہا؟ عاشِقانِ رسول
کاش! عطاؔر کا طیبہ میں خاتِمہ
ہو کرو یہ دعا عاشِقانِ رسول