اللہ ویکھاوے سب نوں
اللہ ویکھاوے سب نوں
او گلیاں مدنی یار دیاں
ہر ویلے ہن جس جاہ تے
پیاں رحمتاں ٹھاٹھاں ماردیاں
جس دم آوے یاد مدینہ
اللہ دی سوں ٹھرجائے دا اے سینہ
سوں رب دی کیا باتاں یارو
اُس نبویﷺ گلزار دیاں
اللہ ویکھاوے سب نوں
او گلیاں مدنی یار دیاں
ملک عرب دیاں پاک فضاواں
جنت توں او ودھ کے تھاواں
جنت نئی کر سکدی ریساں
طیبہ دے بازار دیاں
اللہ ویکھاوے سب نوں
او گلیاں مدنی یار دیاں
او دھرتی اے شاناں والی
وسدا جتھے کونین دا والی
اوتھے معاف خطاواں ہوون
ہر اک اوگنہار دیاں
اللہ ویکھاوے سب نوں
او گلیاں مدنی یار دیاں
نوری شہر تے نوری گلیاں
جتھے مدنی لائیاں تلیاں
اوتھے دور بیماریاں ہوون
جگ دے ہر بیمار دیاں
اللہ ویکھاوے سب نوں
او گلیاں مدنی یار دیاں
جتھے بانگ بلال سناوے
باندھا بن جبرئیلؑ وی آوے
نوری پئے صلاتاں پڑھ دے
کیا باتاں دربار دیاں
اللہ ویکھاوے سب نوں
او گلیاں مدنی یار دیاں
چاراگر پہ چارا لاون
الٹا میرا درد ودھاون
میرے من وچ رچیاں ناصرؔ
مرضاں اوس دے پیار دیاں
اللہ ویکھاوے سب نوں
او گلیاں مدنی یار دیاں