عیاں ہے فیضِ کرم کا ظہور آنکھوں سے
عیاں ہے فیضِ کرم کا ظہور آنکھوں سے
لگایا میں نے جو نامِ حضورؐ آنکھوں سے
مچل رہی ہے تمنائے دید سینے میں
اُبل رہا ہے محبت کا نور آنکھوں سے
ملے گا عشق کی سرمستیوں کا سرچشمہ
حبیبِ پاکؐ کی اُلفت میں چُور آنکھوں سے
نگاہِ یار مری ہر گھڑی محافظ ہے
خدا کرے نہ کبھی ان کی دُور آنکھوں سے
مئے طہُور کسی جام کی نہیں محتاج
لُٹا رہے ہیں وہ کیف و سرور آنکھوں سے
ظہوریؔ درد سے نا آشنا ہی دل رہتا
اگر نہ دید کا ملتا سرور آنکھوں سے