اے صاحبِ شوکت صل علیٰ اے رہبرِ اُمت کیا کہنا
ہر سمت تجلّی ہے تری اے شمعِ رسالت کیا کہنا
ہر سانس تھی محوِ یادِ خُدا ہر بات تھی جانِ اِلا للہ
اس زہد و عبادت کے صدقے یہ شانِ عبادت کیا کہنا
دشمن پہ کرم دشمن پہ عطا دشمن کے لئے بھی لب پہ دُعا
اس شے کو سخاوت کہتے ہیں یہ رنگِ سخاوت کیا کہنا
ہے ذاتِ مقدس خیر بشر ہے آپکی جانب سب کی نظر
کیونکر نہ ہو فرقِ والا پر یہ تاجِ شفاعت کیا کہنا
دنیا کو کیا ہے صاحبِ دیں دنیا کو دیا ہے تاج و نگیں
اے ختمِ رُسل سبحان اللہ اے ختمِ رسالت کیا کہنا
کیا حور و ملک کیا جن و بشر کیا کون و مکاں کیا شمس و قمر
قربان ہے یہ دو عالم تم پر سرتاجِ نبوت کیا کہنا
یہ نعت پڑھوں جب جھوم کے میں انگشت شہادت و چوم کے میں
بہزؔاد حزیں سب لوگ کہیں مداحِ رسالت کیا کہنا