!بے رنگ سے دن رات ہیں اے سیّدِ ساداتؐ

!بے رنگ سے دن رات ہیں اے سیّدِ ساداتؐ

ناگفتنی حالات ہیں اے سیّدِ ساداتؐ

موسم ہے اداسی کا مسلّط دل وجاں پر

!بے برگ خیالات ہیں اے سیّدِ ساداتؐ

بے راہ روی، فتنہ زر ، تفرقہ بازی

!درپے کئی خطرات ہیں اے سیّدِ ساداتؐ

امڈی ہوئی سب عالمِ اسلام کے سر پر

!آفات و بلّیات ہیں اے سیّدِ ساداتؐ

آساں نہیں کچھ ملتِ بیضا کا سنبھلنا

!وہ کرب، وہ صدمات ہیں اے سیّدِ ساداتؐ

یوں خون، مسلماں سے ہیں تر ساری زمینیں

!حیران سماوات ہیں اے سیّدِ ساداتؐ

کشمیر ہو، یا بوسنیا، چیچنیا ہوں

!اعدا کے کڑے ہاتھ ہیں اے سیّدِ ساداتؐ

آشوبِ زمانہ سے نمٹنے کے لیے ، ہم

!محتاج ِ عنایات ہیں اے سیّدِ ساداتؐ