من رآنی کا مدعا چہرہ
صُورتِ حق کا آئنہ چہرہ
سر مگیں چشم آیِہ ما زاغ
زُلف واللّیل والضحٰے چہرہ
عالم ِ خواب میں حقیقت ہَے
آپؐ کا چہرہ، آپؐ کا چہرہ
مصطفؐےٰ آنکھ ہو خُدا صُورت
ہو خُدا آنکھ مصطفٰؐے چہرہ
یہی چہرہ نِشانِ وَجہُ اللہ
ورنہ رکھتا ہَے کیا خُدا چہرہ
یہ ہَے تفسیرِ احسنِ تقویم
ابتداء چہرہ ، انہتاء چہرہ
مرنے والوں کی آخری خواہش
مِرے آقاؐ مجھے دکھا چہرہ
ریگزارِ حیات میں واصفؔ
باغِ فردوس کی ہوا چہرہ