دل دیاں کہنوں سناواں سوہنیاں
کیہڑے در تے سر جھکاواں سوہنیاں
میریاں دیکھیں نہ او گنہاریاں
بخش دے مریاں خطاواں سوہنیاں
چارہ کر کے تھک گئے نے چارہ گر
بخش دے مینوں شفاواں سوہنیاں
آخری سانہواں گزاراں در ترے
میریاں سن لے دعاواں سوہنیاں
میں وی منگتا ہاں ترے دربار دا
ہون میرے تے عطاواں سوہنیاں
بارشاں رحمت دیاں کر میرے تے
میں ترے در دا گدا واں سوہنیاں
گل نیازی دی بناون والیا
میں تیرے قربان جاواں سوہنیاں