دونہہ جہاناں دی رحمت ہے تیرا لقب
نظر رحمت غریباں تے کر سوہنیا
خیر دیدار دا ہُن تے کر دے عطا
سکدے سکدے ای جایئے نہ مرسوہنیا
تیرے در دی غلامی کرن انبیاء
تیری تعریف کردا اے رب العلی
ليلة القدر صدقے تیری زُلف توں
تیرے چہرے توں صدقے قمر سوہنیا
تیرا دیدار خالق دا دیدار ہے
سارے پھلاں دے وچ تیری مہکار ہے
ذرے ذرے دے وچہ تیری چمکار ہے
پتے پتے چہ توں جلوہ گر سوہنیا
شان نبیاں چوں تینوں گرامی ملی
ہر پیمبر دی تینوں سلامی ملی
تیرے در دی ہے جس نوں غلامی ملی
اوہنوں کاہدا جہنم دا ڈر سوہنیا
بھانویں کعبہ تے بھانویں ہے عرش العلی
بھانویں جنت ہے یا سدرۃ المنتہی
سب توں سوہنا اے دربارِ عالی تیرا
سب توں سوہنا ایں تیرا ای گھر سوہنیا
مان رکھ لے میرا ، میرا رکھ لے بھرم
در تے آواں جے ہو جاوے تیرا کرم
کول میرے ہے بس بے بسی بے کسی
میرے پلے نئیں مال و زر سوہنیا
کجھ وی ملدا نئیں تیرے در دے سوا
تیرا در دونہہ جہاناں دا ہے آسرا
ہو کے صائم تیرے پاک در دا گدا
ٹھوکراں کھاوے کیوں در بدر سوہنیا