دنیائےدل ہے زیر و زبر سیّدؐ البشر
ہم بیکسوں کی لیجے خبر سیّدؐ البشر
مہرِ عُروج اب تو دکھائے ہمیں جھلک
شامِ زوال کی ہو سَحَر سیّدؐ البشر
آخر پئیں گے زہرِ غمِ زیست تا بہ کے
تیرے کرم کے دستِ نگر سیّدؐ البشر
کب تک رہے گی ملتّ بیضا رہینِ یاس
اے چارہ سازِ دردِ بشر سیّدؐ البشر
لہکیں گے کب فضاؤں میں نغمے بہار کے
مہکیں گے کب دلوں کے نگرسیّدؐ البشر
کب ہوگا شعرِ تائبؔ عاجز اثر پذیر
کب لائے گا ثمر یہ شجر سیّدؐ البشر