فلک خوبصورت سجایا نہ ہندا
فلک خوبصورت سجایا نہ ہندا
کسے شے دا وی ایتھے سایہ نہ ہُندا
نہ ایہہ عرش کرسی تے نہ چن تارے
شب و روز دے نہ ایہہ ہندے نظارے
نہ جن و بشر تے نہ کوئی پرندہ
حیاتی مماتی نہ مویا نہ زندہ
نہ حوراں دے قصے نہ آدم نہ حوا
نہ یعقوبؑ یونسؑ نہ یوسفؑ زلیخا
نہ تختاں تے تاجاں دے سلطان ہندے
نہ محلاں دے والی نہ دربان ہندے
نہ ملدی کسے نوں کدی زندگانی
ہوا ایہہ نہ ہندی تے نہ ہندا پانی
نبی نہ ولی غوث ابدال ہندے
نہ ہندے مہینے نہ ایہہ سال ہندے
ربیع الاول دا نہ ہندا مہینہ
کوئی جاندا نہ اوہ مکہ مدینہ
نہ میلاد ہندے نہ ایہ نعت خوانی
ثنا خواں نہ ہندے نہ ایہہ خوش بیانی
نہ عرشی نہ فرشی نہ خاکی نہ نوری
زمانے تے کجھ وی نہ ہندا ظہوریؔ
کسے چیز دا ایتھے سایہ نہ ہندا
جے رب نے محمدؐ بنایا نہ ہندا