ہر شے میں ہے نورِ رُخِ تابانِ محمّدؐ
ہر شے میں ہے نورِ رُخِ تابانِ محمّدؐ
ہر پھول میں خوشبوئے گلستانِ محمّدؐ
اللہ نے محبوب کو بے مثل بنایا
ممکن ہی نہیں ہو کوئی ہمشانِ مُحمّدؐ
آسکتا ہے کب ہم سے گنواروں کو وہ ادب
جیسا کہ اَدب کرتے تھے یارانِ مُحمّدؐ
وہ دل ہی نہیں جو نہ جھکے سُوئے مدینہ
وہ سر ہی نہیں جو نہ ہو قربانِ مُحمّدؐ
اعداء کی شقاوت کہ ہوئے آپؐ کے منکر
اور سنگ و شجر تابعِ فرمانِ مُحمّدؐ
محبوبِ خدا حاکِم مخلوقِ اِلٰہی
مخلوقِ خُدا تابعِ فرمانِ مُحمّدؐ
تفسیر نے لَوْ لَا کَ لَمَا کی یہ پکارا
وہ کون ہے جس پر نہیں احسانِ مُحمّدؐ
عشّاق سمجھتے ہیں اُسے گلشنِ جنّت
کہتے ہیں جسے لوگ بیابانِ مُحمّدؐ
چلتا ہے جو زائر تو یہ کہتے ہیں فرشتے
دیکھو وہ چلا آتا ہے مہمانِ مُحمّدؐ
شیروں پہ شرف رکھتے ہیں دربار کے کتے
شاہوں سے بھی بڑھ کر ہیں گدایانِ مُحمّدؐ
کیا پو چھتے ہو مجھ سے نکیرین لحد میں
لو دیکھ لو دِل چِیر کے اَرمانِ مُحمّدؐ
قیدی کو چھڑا دیتا ہے اِک اُن کا اِشارہ
مجرم کو چھپا لیتا ہے دامانِ مُحمّدؐ
ہم جائیں گے فردوس میں رضواں سے یہ کہہ کر
روکو نہ ہمیں ہم ہیں غلامانِ مُحمّدؐ
تو صیف و ثنا لکھے جمیؔل ِ رضوی کیا
جب صانع مطلق ہے ثنا خوانِ مُحمّدؐ