ہواؤ! سرورِ عالم کے در کی بات کرو
گھٹاؤ! طیبہ کے شام و سحر کی بات کرو
سناؤ مجھ کو نہ سیرِ جہاں کے افسانے
مدینے پاک کے پیارے سفر کی بات کرو
غمِ فراقِ نبیؐ میں جو با وضو ہی رہے
خوشا نصیب اسی چشمِ تر کی بات کرو
ہٹا دو سر سے مرے دوستو طبیبوں کو
مدینے والے مرے چارہ گر کی بات کرو
وہ جن کے دم سے بہارِ حیات قائم ہے
نبیؐ کے باغ کے برگ و ثمر کی بات کرو
ظہوریؔ دیکھ کے آیا ہوں ذرے بطحٰی کے
نہ میرے سامنے شمس و قمر کی بات کرو