ہوا جلوہ فرما نگارِ مدینہ
دلہن بن گیا ہے دیارِ مدینہ
معّطر معّطر ‘ منّور منّور
خوشا یاد قرب و جوارِ مدینہ
کوئی نقش‘ نقشِ تمنّا نہیں ہے
نگاہوں میں ہے شاہکارِ مدینہ
ہوئے سر بہ سر سجدہ بتانِ مجازی
بڑھا جس طرف شہر یارِ مدینہ
شہنشاہِ شاہانِ عالی مراتب
گدائے درِ تاجدارِ مدینہ
ہیں اپنی جگہ خلد و فردوس لیکن
!!دیارِ مدینہ ‘ دیار ِ مدینہ
کوئی مجھ سے پوچھے میں کیا چاہتا ہوں
فقط ایک مشتِ غبارِ مدینہ
سراپا عقیدت ہے اقبؔال یعنی
فدائے حرم ‘ جاں نثارِ مدینہ