حُسنِ حبیب دوجہاں یوں ہَے تصوّرات میں
جیسے ظہُور ماہتاب غم کی اندھیری رات میں
مِل نہ سَکی کہیں تِری طبعِ سلیم کی مِثال
خُلقِ عظیم کا تِرے شور ہَے شش جہات میں
کِس کی تجلّیات سے خیرہ ہَے چشمِ آفتاب
کھوئی گئی ہَے کائنات کِس کے تصوّرات میں
کِتنے نشے پِلا گیا مژدہ تِرے ظہُور کا
اَب بھی خمار ہَے وہی دیدۂ کائنات میں
تیرے قدم میں تھی نہاں عظمتِ ہفت آسماں
ورنہ یہ عرش و لامکاں گُم ہیں تمہاری ذات میں
مِٹ گئے اِک نگاہ سے تیری جہاں کے وسوسے
ڈوبا ہُوا ہَے فلسفی اب بھی توہمّات میں
اعظم بے خبر اُٹھا آنکھ سے پردۂ دُوئی !
جلوہ فِگن ہے عینِ ذات آئینۂ صفات میں