جمال ہستی دا حسن سارا مرے نبی دے جمال وچ اے
کمال ہر اک نبی دا آیا مرے نبی دے کمال وچ اے
کیویں تصور چ حُسن اوہدا کوئی مصور لیا اے سکدا
اوہ رنگت اوہدے بلال دی اے جو حُسن حوراں دے خال وچ اے
کی رتبہ صدیق دا توں پچھیں بلال جنہے خرید کیتا
ہے پھر دا جنت دی سیر کردا ایہہ خوبی جد کہ بلال وچ اے
نبی دی تعریف و نعت تائیں جو حمد آکھن توں روکدا اے
جدوں وی آکھے گا اوہ محمد جواب اوہدے سوال وچ اے
میں اہل دنیا دی گل ولے دھیان دیواں تے کیویں دیواں
مدینے والا اے میرے دل وچ مدینہ اوہدا خیال وچ اے
چوفیرے مومن دا حال مندا چوفیرے غلبہ اے کافراں دا
کرم دی کر دے نظر کریما ایہہ تیری اُمت زوال وچ اے
کوئی وی آل نبی دا ثانی ناں ہویا آج تک ناں ہو سکے گا
میرے محمد دا نور صائم میرے محمد دی آل وچ اے
شاعر کا نام :- علامہ صائم چشتی
کتاب کا نام :- کلیات صائم چشتی