جھلیاں ہنیریاں تے رحمتاں سنبھالیا
جھلیاں ہنیریاں تے رحمتاں سنبھالیا
بجھیا نہ دیوا جیہڑا نبی سوہنے بالیا
نام نبی نال ساڈی جان تے پچھان اے
ایسے نام نال ساڈا نام تے نشان اے
سانوں تے حضور دیاں نسبتاں نے پالیا
برکتاں تے رحمتاں دا انت نئیں، حساب نئیں
روضے سوہنے نبی دا تے کتے وی جواب نئیں
سارا جگ اکھیاں نیں ویکھیا تے بھالیا
جنہاں نے اڈیکاں سوہنے یار دیاں رکھیاں
سچ کہواں اوہو بھاگاں والیاں نے اکھیاں
جلوہ حضور جنہاں اکھاں نوں وکھا لیا
کنے میرے آقا وانگوں ساڈے لئی رونا اے
اوہدے جیہا سخی کوئی ہویا اے نہ ہونا اے
کوئی نہ سوالی جنہے بوہے اتوں ٹالیا
کائنات وچ ساڈا سوہنا بے مثال اے
اوسے دا سہارا رہندا ساڈے نال نال اے
جدوں اسیں ڈگے، سانوں اوس نے سنبھالیا
سوہنے پچھے اونہاں سارا غم دکھ سہنا اے
عاشقاں ظہوریؔ کدوں ٹھنڈا ہو کے بہنا اے
جنہاں نوں وچھوڑے والی اگ نے ابالیا