جہنوں سد دے حضور او ہو جاندا اے مدینے
جہدے بخشنے قصور اوہو جاندا اے مدینے
جہدے دل چوں گناہواں دا وبال کڈھ کے
بھر دینا ہندا نور اوہو جاندا اے مدینے
جہنوں حشر والے روز دوزخاں دی اگ توں
مولا رکھنا ایں دُور اوہو جاندا اے مدینے
جیہڑے صاحب نصیب بندے خاص خاص تے
راضی ہندا اے غفور اوہو جاندا اے مدینے
سوہنا ربّ دا حبیب سارے جگ دا طبیب
جہنوں کرے منظور اوہو جاندا اے مدینے
ایس جگ وچ جنتاں چ تھاں جیس نوں
دینا ہندا اے ضرور اوہو جاندا اے مدینے
صائم آس جیہڑا ٹُٹ دی نوں رہوے جوڑ وا
لے کے دل مجبور اوہو جاندا اے مدینے