خُدایا نئی زندگی چاہتا ہوں
خُدایا نئی زندگی چاہتا ہوں
فقط دل میں حُبِّ نبی چاہتا ہوں
مرے دل میں رہنے دے عشقِ مُحمَّد
میں اے چارہ گر کب کمی چاہتا ہوں
مدینے کی گلیاں ہوں اور میرا سر ہو
میں اپنے میں یہ بیخودی چاہتا ہوں
ہر اک ذرّہ جن پر کہے یا مُحمَّدؐ
وہ جلووں کی تابندگی چاہتا ہوں
مُحمَّد ہو یا مصطفےٰ ہو کہ احمدؐ
ہر اک لفظ پر بیخود ی چاہتا ہوں
گذر جائے جو صرف یادِ نبیؐ میں
میں حق سے وہی زندگی چاہتا ہوں
ہو نامِ مُحمَّد سے آغاز جس کا
میں بہزادؔ وہ شاعری چاہتا ہوں