کچھ ایسی لطف و کرم کی ہوا چلی تازہ
کچھ ایسی لطف و کرم کی ہوا چلی تازہ
کہ میرے دل میں کھلی نعت کی کلی تازہ
حرم کی تیرہ شبی جس سے مستنیر ہوئی
حرا کی کوکھ سے پھوٹی وہ روشنی تازہ
بہارِ قلب و نظر کا سماں ہوا پیدا
نہالِ دل میں شگوفے کھلے کئی تازہ
صدا کو زمزمۂ نو، حروف کو معنی
مِلی مغنّیِ جاں کو بھی نغمگی تازہ
ترے ثبات سے عزمِ حسینؑ زندہ ہے
تیرے جلال سے ہے ضربِ حیدری تازہ
ترے ہی ساز سے پُر سوز سینۂ حبشی
ترے ہی فقر سے روحِ ابوذری تازہ
فروغِ جلوہ گہِ کُن ترے ہی دَم سے ہے
ترے کرم سے ہے بُستانِ زندگی تازہ
پڑے جبیں پہ شکن تو فلک لرز اٹھے
جو مسکرائے تو ہو رسمِ دلبری تازہ
ترے پیام سے فکر و شعور چونک اٹھے
ملی تعجب و حیرت کو آگہی تازہ
ترے مزاج سے تہذیب کی ہوئی تذہیب
ملی تمدّنِ بے جاں کو زندگی تازہ
کتابِ دل کو عطا کی ہے شرحِ نو تو نے
حدیثِ شوق کو بخشی ہے دل کشی تازہ
ترے نثار! دگرگوں ہے حال اُمّت کا
سجا رہا ہے جہاں بزمِ کافری تازہ
عطا ہو پھر دلِ مسلم کو حیدریؑ جوہر
فضائے صحنِ حرم میں ہے ابتری تازہ