مقام سب توں اچیرا مدینے والے دا
پرے ہے عرش توں پھیرا مدینے والے دا
ابد دی شام اہدی زُلف دی سیاہی اے
ازل دا رُخ ہے سویرا مدینے والے دا
اُنہاں دلاں تے فرشتے سلام پڑھدے نے
جنہاں دلاں چہ ہے ڈیرا مدینے والے دا
ہے راج سارے زمانے تے میرے سوہنے دا
ہے ساری خلق تے گھیرا مدینے والے دا
جنہاں نے ظُلم سی کیتے انہاں نوں گل لاوے
ہے کنا صبر تے جیرا مدینے والے دا
پتا ہے دسیا رفَعْنَا دی پاک آیت نے
شان ہندا ودھیرا مدینے والے دا
کسے توں منگاں تے صائم بھلا میں کیوں منگاں
کرم ہے مینوں بتھیرا مدینے والے دا