معراج دی راتیں آقا نے جبریل نوں ایہہ فرمایا اے
معراج دی راتیں آقا نے جبریل نوں ایہہ فرمایا اے
توں ویکھیاں بڑیاں بڑیاں نوں کوئی میں جیہا نظریں آیا اے
جبریل کیہا سبحان اللہ! ہے کون جو تیرے نال ملے
نہ تیرا کتے جواب ملے نہ تیری کوئی مثال ملے
سدرہ تے ظہوریؔ آقا نے فر پچھیا ہن کیہہ کہنا ایں
توں اگے نال لے جانا سی ایتھے کیوں پچھے رہنا ایں
فرشاں توں لے کے عرشاں دا ساتھی آں، مونہوں کڈھیا ای
رستے وچہ آ کے سدرہ تے ہن ساتھ مرا کیوں چھڈیا ای
جبریل کیہا محبوب خدا ترا رتبہ سب توں بالا اے
اوہ مالک خالق عرشاں تے تینوں آپ بلاون والا اے
ایتھوں اگے جیہڑی جوہ آئی اس جوہ دی توں ای سونہہ جانے
ایتھے آ کے مری حد مک گئی اگاں رب جانے یا توں جانے