میرے کملی والے دی تعریف سُن کے دل عاشقاں شاد ہندا رہوے گا
جدوں تیک دُنیا ایہہ وسدی رہوے گی محمد دا میلاد ہندا رہوے گا
کویں سوہنا آیا تے کی کی سی ہویا کویں رب نے رحمت دی برسات کیتی
اوہ ویلا سدا یاد کر دے رہواں گے اوہ ویلا سدا یاد ہندا رہوے گا
محمد دا سجن خدا دا اے سجن ، محمد دا دشمن خدا دا اے دشمن
مرے کملی والے دا گستاخ جیہڑا دو عالم چ برباد ہندا رہوے گا
کہیا رب نے ذکر نبی نوں رَفعنا ، سدا ذکر اوہدا بلندی تے جانا
نبی پاک دی نعت دا ہر جگہ تے نواں شہر آباد ہندا رہوے گا
جدوں تک نبی دی غلامی کرے گا، جدوں تک نبی دی سلامی بھرے گا
جفا دے ہنیرے تے گھیرے دے وچوں مسلمان آزاد ہندار ہوے گا
کدی کفر دے فتوے مومن تے لانویں ، کدی کر کے اتحاد جپھیاں توں پاویں
کدوں تیک کافر بنوندا رہویں گا کدوں تیک اتحاد ہندا رہوے گا
سدا سُنیاں نوں مدینے چوں نالے، نجف وچوں امداد مل دی رہوے گی
تے سایہ فگن ساڈے سر اُتے صائم شہنشاہ بغداد ہندا رہوے گا
شاعر کا نام :- علامہ صائم چشتی
کتاب کا نام :- کلیات صائم چشتی