میری سوچوں کی منزل تِری نعت ہے
اور الفاظ کی حاضری نعت ہے
در حقیقت نبی کے ثناء خوان کی
سادگی، عاجزی، بےخودی نعت ہے
یاد آ جائے گر شہرِ ماہِ عرب
آنسو نکلیں تو سمجھو یہی نعت ہے
دل میں ہو شوقِ دیدِ شہِ عالمیں
چشمِ تر میں چھپی بے بسی نعت ہے
قبر میں ہو گئی اُن کی پہچان اگر
پھر گزاری ہوئی زندگی نعت ہے
خستہ حال امتِ جاِں بلب کیلئے
دلربا! دلربائی تِری، نعت ہے
مُکشِفِ حمد ہے آمدِ مصطفٰی
آمدِ مصطفٰی کی خوشی نعت ہے
مجھ تبسم کی آشفتگی کا علاج
آپ کی نعت ہے آپ کی نعت ہے