مرے دل میں ہے آرزوئے مُحمَّدؐ
مرے دل میں ہے آرزوئے مُحمَّدؐ
الٰہی دکھا مجھ کو کوئے مُحمَّدؐ
الٰہی رہے قوتِ نطق جب تک
میں کرتا رہوں گفتگوئے مُحمَّدؐ
یہ بار گنہ یہ خطائیں یہ عصیاں
کہوں گا میں کیا روبروئے مُحمَّدؐ
ذرا اُمت ِ زار کا حال کہنا
صبا جارہی ہو جو کوئے مُحمَّدؐ
اگر پا برہنہ ہیں تو خوف کیا ہے
ہیں گُل اصل میں خارِ کوئے مُحمَّدؐ
ہے رنگِ مُحمَّدؐ زمانے پہ چھایا
بسی ہے زمانے میں بوئے مُحمَّدؐ
عبادت ہے بہزؔاد اِنھیں کی محبّت
چلو اب چلیں سوئے کوئے مُحمَّدؐ