مُصطفےٰ مُجتبےٰ محمدؐ ہیں
شانِ رب العُلیٰ محمدؐ ہیں
دردِ دِل کی دَوا محمدؐ ہیں
ہر مرض کی شفا محمدؐ ہیں
رحمتِ دو جہَاں نویدِ کرم
بحرِ جود و سخا محمدؐ ہیں
آدمؑ و نوح ؑ سے کوئی پوچھے
کیسے حَاجت روا محمدؐ ہیں
چشمِ بینا سے دیکھ اے زاہد
ہر طرف جا بجا محمدؐ ہیں
ان سے کونین میں اجالا ہے
نورِ حق کی ضِیا ء محمدؐ ہیں
یہ ملائک بھی راز پا نہ سکے
کون بتلائے کیا محمدؐ ہیں
میرا ایمان ہے یہی خالدؔ
میرے مشکل کشا محمدؐ ہیں