قرضِ سنت و قرآں کا نادہندہ ہوں
قرضِ سنت و قرآں کا نادہندہ ہوں
معاف کردیجیے آقاؐ شرمندہ ہوں
آنسو درود بھیجیں سانسیں پڑھیں سلام
کتنی قیمتی آب و ہوا میں زندہ ہوں
میرا مستقبل ہے میرے ماضی میں
صدیوں قبل کی آوازِ آئندہ ہوں
جا بیٹھوں اکثر ان کی دیواروں پر
شہر ہجرِ نبیؐ کا ایک پرندہ ہوں
لفظوں سے تعمیر کروں میں نعت محل
شاعر کیا ہوں ادنیٰ سا کارندہ ہوں
منکر نکیر میرا استقبال کرو
خیر البشر کے قدموں کا باشندہ ہوں
دھو گئی سارے رنج مظفر ایک نظر
اندھیاروں کی بھیڑ میں بھی تابندہ ہوں