صَلِّ عَلٰی نَبِیِّنا
تجھ سے سخن کی آبرو
میری متاع فکر تو
میرا ہنر تِری ثنا
صَلِّ عَلٰی نَبِیِّنا
تیرا شعور بے بہا
اوج بشر کی انتہا
فرش سے عرش تک رہا
آنکھ سے روح تک گیا
چادرِ نور جسم پر
پردہ میم اسم پر
عبد سے عبد، بنا
صَلِّ عَلٰی نَبِیِّنا
تو ہے نوائے ایزدی
گونج تِری صدی صدی
تیرا قیام بھی سفر
تیرا سراب بھی ندی
چاہا تجھے حیات نے
مادر کائنات نے
تجھ سا بشر نہیں جنا
صَلِّ عَلٰی نَبِیِّنا
فقر بھی تیرا شاہ گر
سایہ بھی مطلع سحر
نغمہ و نکہت و چراغ
صوت و سماعت و نظر
عکس خدائے لم یزل
آئنہ خانہ عمل
پیری شباب بچپنا
صَلِّ عَلٰی نَبِیِّنا
تو مِرا مرکز و اساس
میرا سکون تیرے پاس
میری نظر میں تیرے رنگ
میری رگوں میں تیری باس
اے مِرے والی و امیر
میں تِرے حسن کا اسیر
میں تِرے عشق میں فنا
صَلِّ عَلٰی نَبِیِّنا
کرتا رہا تِرا مزاج
چارہ گروں کا بھی علاج
جن کے سروں پہ گھاؤ تھے
بخش دیے تُو نے ان کو تاج
خاک بسر ہوا غرور
کانپ اُٹھا تِرے حضور
تاجوروں کا طنطنہ
صَلِّ عَلٰی نَبِیِّنا