شاہِ گردُوں مقام عرش خرام
مظہرِ ذُو الجَلال و الاکرام
خیرِ خلقِ خُدا و رحمتِ کُل
سیّدُ الانبیا علیہ سلام
مخزنِ عِلم و پیکرِ حِکمت
ہیں فصُوصِ حِکم حُروفِ کلام
کُنْتُ کنزاً کی وادیوں کا نُور
آسمانِ قدِم کا ماہِ تمام
وَرَفعْنَا کی رِفعتوں کا امیں
ابو الا رْواح کا بھی پیش امام
رازدارِ دنےٰ و اَو اَدنے ٰ ٰ
کِتنا اَرفع ہے عبدہٗ کا مقام
مطلعِ انبیا حضور کی ذات
مقطعِ انبیا حضُور کا نام !
نازشِ فقرِ جانِ محبُوبی
سروری زیر پا و حُسن بہ دام
اشرف الخَلق جسمِ پاکِ حضور
احسن الذکر ذکرِ شاہِ انام
زینتِ فرق افسرِ لولاک
سر برہنہ ہَیں تاجدار تمام
ہر سرِ مُوئے گیسُوئے واللّیل
شبِ اسریٰ کی اک سہانی شام
مشعلِ والضّحےٰ جبینِ مبیں
چشمِ مازاغ مستیوں کا پیام
گلِّ عارض حدیقۂ عِرفاں
لبِ شیریں حیات کا پیغام
دَہَنِ پاک میں زباں ایسی
جس زباں کا اک ایک لفظ الہام
وہ سخن ہے نہیں بیاں جس کا
وہ بیاں ہے نہیں ہے جس میں کلام
سینہ آئینۂ اَلَم نشرَح
دل خدا کی امانتوں کا مقام
تھا یہی انِشراحِ صَدر کا راز
اس سے لینا تھا آئنے کا کام
ہاتھ مشکل کُشائیوں کی کلید
جس سے کھُل جائے ہر درِ انعام
ہیں یدُ اللہ فَو قَ اَیدِیھْمْ
انہی ہاتھوں میں دو جہاں کی زمام
خاکِ نعلینِ پاک وہ جس سے
عرش کے بھی چمک اُٹھیں در و بام
خاکِ بَطحا بھی کیا عجب شے ہے
جس کو حاصِل ہے اُن کا قرب مدام
تو بھی اعظؔم غبارِ رہ بن جا
چاہتا ہے اگر حضُورِ دوام