تُو کُجا من کُجا
تُو امیرِ حَرَمْ
مَیں فقیرِ عَجَمْ
تیرے گُن اور یہ لَب؟
مَیں طلب ہی طلب
تو عطا ہی عطا
تُو کُجا من کُجا
تُو اَبد آفریں ، مَیں ہُوں دو چار پَل
تُو یقیں ، مَیں گماِں ،میں سخن ، تُو عمل
تُو ہے معصُومیّت
مَیں نِری معصیّت ، تُو کرم ، مَیں خطا
تُو کُجا مَن کُجا
تُو ہے احرامِ انوار باندھے ہُوئے
میں درُودوں کی دستار باندھے ہُوئے
کعبہء عشق تُو
مَیں تِرے چار سُو، تُو اثر، مَیں دُعا
تُو کُجا ، من کُجا
تُو حقیقت ہے ، مَیں صِرف اِحساس ہُوں
تُو سمندر، مَیں بھٹکی ہُوئی پیاس ہُوں
میرا گھر خاک پر
اور تِری رہ گزر سِدْ رَ ۃُ الْمُتْہَاَ
تُو کُجا من کُجا
میرا ہر سانس تو خُوں نچوڑے مِرا
تیری رحمت مگر دِل نہ توڑے مِرا
کاسئہ ذات ہُوں
تیری خیرات ہُوں ، تُو سخی مَیں گدا
تُو کُجا من کُجا
ڈگمگاؤں جو حالات کے سامنے
آئے تیرا تصوُّر مجھے تھامنے
میری خُوِش قِسمتی
مَیں تِرا اُمّتی ، تُو جزا مَیں رضا
تُو کُجا من کُجا
میرا ملبوس ہے ، پردہ پوشی تِری
مُجھ کو تابِ سخن دے ، خموشی تری
تُو جلی ، مَیں خفی
تُو اٹل مَیں نفی، تُو صِلا مَیں گِلہ
دُوریاں سامنے سے جو ہٹنے لگیں
جالیوں سے نگاہیں لپٹنے لگیں
آنسوؤں کی زباں
ہو مِری تر جماں، دِل سے نکلے صدا
تُو کُجا من کُجا