وَرَفَعنَا لَکَ ذِکرَک
تِری خوشبو مِری چادر
تِرے تیور مِرا زیور
تِری گاگر
مِرا ساگر
تِرا صحرا مِرا پنگھٹ
میں ازل سے تِرا پیاسا
نہ ہو خالی مِرا کاسہ
تِرے واری تِرا بالک
وَرَفَعنَا لَکَ ذِکرَک
تِری مدحت مِری بولی
تو خزالہ میں ہوں جھولی
تِرا سایا
مِری کایا
تِرا جھونکا مِری ڈولی
تِرا رستہ مِرا ہادی
تِری یادیں مِری وادی
تِرے ذرّے مِرے دیپک
وَرَفَعنَا لَکَ ذِکرَک
تِرے دم سے دلِ بینا
کبھی فاراں کبھی سینا
نہ ہو کیوں پھر
تِری خاطر
مِرا مرنا مِرا جینا
یہ زمیں بھی ہو فلک سی
نظر آئے جو دھنک سی
تِرے در سے مِری جاں تک
وَرَفَعنَا لَکَ ذِکرَک
میں ہوں قطرہ تو سمندر
مِری دنیا تِرے اندر
سگِ داتا
مِرا ناتا
نہ ولی ہوں نہ قلندر
تِرے سائے میں کھڑے ہیں
مِرے جیسے تو بڑے ہیں
کوئی تجھ سا نہیں بیشک
وَرَفَعنَا لَکَ ذِکرَک
میں ادھورا تو مکمل
میں شکستہ تو مسلسل
میں سخنور
تُو پیمبر
مِرا مکتب تِرا اک یل
تِری جنبش مِرا خامہ
تِرا نقطہ مِرا نامہ
کیا تو نے مجھے زیرک
وَرَفَعنَا لَکَ ذِکرَک
مِری سوچیں ہیں سوالی
مِرا لہجہ ہو بلالی
شب تِرہ
کرے خِیرہ
مِرے دن بھی ہوں مثالی
تِرا مظہر ہو مِرا فن
رہے اُجلا مِرا دامن
نہ ہو مجھ میں کوئی کالک
وَرَفَعنَا لَکَ ذِکرَک