یہی اِک آرزو دل کی ہے کاش بر آئے
یہی اِک آرزو دل کی ہے کاش بر آئے
مدینہ جائے مِری جاں نہ لوٹ کر آئے
ہمارے گھر میں تو طغریٰ ہےاسمِ احمدکا
مجال ہے جو مصیبت ہمارے گھر آئے
خدا سے دولتِ دیدارِ مصطفےٰ مانگوں
دعا میں اپنی بھی اے کاش کچھ اثر آئے
ہمیشہ یونہی جو یادِ نبی رہے قائم
غمِ فراق میں تپ تپ کے دل نکھر آئے
نہ پوچھ کیف و سرورِ حریمِ ناز نہ پوچھ
جو اہلِ ہوش گئے مست و بے خبر آئے
وہ دن بھی آئے کہ ہم بھی کہیں شفیقؔ کبھی
خدا کے گھر سے حبیبِ خدا کے گھر آئے