زہے عزتِ و افتخارِ مدینہ
زہے عزتِ و افتخارِ مدینہ
فزوں عرش سے ہے وقارِ مدینہ
بڑی پر کشش ہے بَہارِ مدینہ
گلوں سے بھی بہتر ہے خارِ مدینہ
رخِ ”والضحیٰ“ ہے نگاہوں کی زینت
خیالوں کا مرکز دیارِ مدینہ
خدایا مری آرزو بس یہی ہے
” پسِ مرگ کردے غبارِ مدینہ“
حضوری کا پروانہ اب تو عطا ہو
میں کب تک کروں انتظارِ مدینہ
نہ چھیڑو ابھی ذکرِ گل اور گلشن
ابھی ہے تصور میں خارِ مدینہ
بھنور میں مصیبت کے کشتی پھنسی ہے
کرم کی نظر تاجدارِ مدینہ
برستا ہے پیہم جہاں ابرِ رحمت
دکھا دے وہی رَہ گزارِ مدینہ
طلب گارِ جنت فدا ہوں نہ کیوں کر
کہ جنت ہے خود جب نثارِ مدینہ
یہ سینہ ہو عشق رسالت کا مسکن
”مرا دل بنے یادگارِ مدینہ“
نہ اترے کبھی جیتے جی یا الٰہی
چڑھا ہے جو مجھ پر خمارِ مدینہ
بصارت بصیرت ملے گی اے احمد
لگا آنکھ میں تو غبارِ مدینہ