زندگی اپنے لہُو کا نام ہے
زندگی اپنے لہُو کا نام ہے
اعِتبارِ آرزُو کا نام ہے
زندگی ہے لذّتِ سوزِ دوام
زندگی ہر حال میں ہے تشنہ کام
زندگی اِک آرزوئے خام ہے
زندگی زندہ برائے نام ہے
زندگی حسرت بھری فریاد ہے
زندگی گو یا کسی کی یاد ہے !
اشکباری زندگی کا مشغلہ
ہر قدم پر زندگی اک مرحلہ
پی رہی ہے زندگی اپنا لہُو
لوٹتی ہے آپ اپنی آبرُو !
سوزشِ دردِ جگر ہَے زندگی
ایک خوابیدہ سحر ہے زندگی
زندگی اک وادئ پُر خار ہے
گویا رسوائی سرِ بازار ہے !
زندگی ہے ایک گردابِ بلا
زندگی ہے آپ اپنا نا خُدا
زندگی ہی زندگی کا ناگ ہے
زندگی پانی میں زندہ آ گ ہے
اِک مسافر کا سفر ہے زندگی
پُر خطر اِک رہگزر ہے زندگی
زندگی بھُولی ہوئی منزل بھی ہے
زندگی ٹوٹا ہوا اِک دل بھی ہے
زندگی کا ہر فسانہ زندگی !
جانے والوں کا نہ آنا زندگی !
زندگی خود شانہء الہام ہے
فکر میں ڈوبی ہوئی اِک شام ہے
زندگی فنکارئ معمار ہے
زندگی گِرتی ہوئی دیوار ہے !
دے رہی ہے زندگی ہر دم صدا
"حسر تا وا حسرتا واحسرتا "
زندگی آنکھوں کےنم کا نام ہے
زندگی خاموش غم کا نام ہے
زندگی ہے ایک گو نہ انتظار
بے قراری زندگی کا ہے قرار
زندگی ہے آگ میں جلنے کا نام
زندگی ہے پھولنے پھلنے کا نا م
ہاتھ سے جائے تو لا شہ زندگی ،
ورنہ ہے ذوقِ تماشہ زندگی
دل جواں ہو تو جواں ہے زندگی
ورنہ مرگِ نا گہاں ہے زندگی !
ہے خمِ زُلفِ نگاراں زندگی !
ہے کبھی جشنِ بہاراں زندگی
زندگی دیپک بھی ہے ملہار بھی
زندگی آتش بھی ہے گُلزار بھی
گاہ ہستی رہ روِ افلاک ہے
گاہ یہ خاموش زیرِ خاک ہے
زندگی ہے اک تبسّم زیر لب
زندگی شمعِ فروزاں نیم شب
زندگی اقوال بھی احوال بھی !
زندگی آئینہِ اجمال بھی !
زندگی کی ضرب ہے ضربِ کلیم
زندگی گاہے کُلہ گاہے گلیم !
زندگی ہے ایک بحرِ بے کراں ،
یہ کبھی صحرا کبھی کوہِ گراں
زندگی ہے اِک پریشاں داستاں
کوئی حصّہ ہے یہاں کوئی وہاں
ہے کبھی یہ ایک حرف آرزو
ہے کبھی یہ بے نیازِ جستجو
گردشِ شام و سحر ہے زندگی
ایک سیمابی نگر ہے زندگی !
زندگی غریانیِ اجسام بھی !
زندگی ہے گردشِ ایّام بھی !
نقشِ فریادی بھی ہے تصویر بھی
زندگی ہے شوخئ تحریر بھی
زندگی کیا ہے سہانا خواب ہے
زندگی اِک گوہرِ نایاب ہے
آنسوؤں کی ایک مالا زندگی !
چاند سے چہرے کا ہالا زندگی !
تھم بھی جائے تو رواں ہے زندگی
داستانِ کن فکاں ہے زندگی
ہے کبھی تسلیم کی خُو زندگی !
ہے کبھی "میں " اور کبھی تُو زندگی
زندگی ہے کُشتّہِ تیغِ ستم !
یُوں بھی ہے ہستی کا اندازِ کر م
مفلسی میں بھی گزر کرتی ہے یہ
تخت پر بھی سسکیاں بھرتی ہے یہ
زندگی محبُوب کی قُربت بھی ہے
زندگی افسانہِ فُرقت بھی ہے
گیسوئے خم دار کا سایہ بھی ہے
زندگی نے خود کو بہلایا بھی ہے
ایک شوخی ہے حیا ہے زندگی
حُسن ہے حُسنِ اَدا ہے زندگی
کامنی سی ایک صُورت زندگی
موہنی سی ایک صورت زندگی
زندگی ہے ایک چشمِ سُر مگیں
زندگی ہے ایک زُلفِ عنبریں
زندگی سہمی ہوئی دُلہن بھی ہے
زندگی بے نام سا مدفن بھی ہے
ہے نوازش ہائے موسم زندگی
ہے کبھی قند اور کبھی سم زندگی
جگمگاتے آبگینوں کے لیے
زندگی ہے مہ جبینوں کے لیے
زندگی ہے موردِ الزام بھی !
مے کدے میں اِک سہانی شام بھی
زندگی ہے زخمہء و مضراب بھی
مر مریں باہوں میں اِک سیماب بھی
رقص کرتی ہے سرِ مژگاں کبھی
دم بخود ہوتی ہے یہ بے جاں کبھی !
اِک تماشا ہے تماشائی بھی ہے
زندگی معشوقِ ہر جائی بھی ہَے !
زندگی کا شفل مے نوشی بھی ہے
زندگی کا فعل غم پوشی بھی ہے
زندگی نیرنگیء دوراں بھی ہے
یہ رہینِ منّتِ درباں بھی ہے
کاسہء ہستی کبھی بھرتا نہیں !
زندگی بھر دل کبھی مرتا نہیں
ٹھو کریں کھا کر بدل جاتی ہے یہ
ایک پَل میں بھی سنبھل جاتی ہے یہ
زندگی ہے چاک ہوجانے کی خُو
دامنِ ہستی کیا کِس نے رفُو ؟
زندگی اپنے جنوں کا نام ہے
زندگی آنکھوں میں خوں کا نام ہے
موجہء آب ِ رواں ہے زندگی
زندگی کے درمیاں ہے زندگی
زندگی کیا ہے بُجز سوزِ دروں
زندگی ہے آیہء لَا یحزنوں!
زندگی ذوقِ فنا کا نام ہَے !
یہ تقین حاصلِ ابہام ہَے !
لاکھ حیلوں سے گزر کرتی ہے یہ
زندہ رہنے کے لیے مرتی ہے یہ
موت ٹل جائے تو کوئی غم نہیں
ورنہ محشر سے یہ ہستی کم نہیں
نا مکمّل ہے ابھی تک کائنات
کر رہی ہے زندگی کچھ تجربات
ساز کے سینے میں اِک آواز ہے
زندگی کیا ہے سراپا راز ہے
زندگی گُل میں مثالِ رنگ و بُو
جیسے فن میں صاحبِ فن کا لہُو
زندگی الفاظ میں آتی نہیں
راز افشانی اسے بھاتی نہیں
اپنی آزدی میں یہ مجبُور ہے
زندگی رِ ستا ہوا ناسور ہَے
کِس نے پایا ہے سُراغِ زندگی
زندگی ہے خود چراغِ زندگی
فلسفی سمجھا نہیں مجبُور ہَے
زندگی خود زندگی سے دُور ہے
زندگی ساحل بھی ہَے طوفان بھی
خود مسیحا ، خود بلائے جان بھی !
ہاں مگر یہ زندگی اِنعام ہَے
خالقِ مطلق کا اپنا کام ہے
زندگی ہے سنگِ دَر کی آرزو
خوب سے ہے خوب تَر کی جستجو
زندگی ہے مظہرِ ظلِّ اِلٰہ!
زندگی کا راز ہَے کرب و بلا
زندگی کا مَدعا دیدہ وری
زندگی کی موت ہے سودا گری
زندگی روشن جبیں کا نام ہے
زندگی پختہ یقیں کا نام ہے
زندگی ہے واجبِ صَد احترام
زندگی ہَے انقلاب ِ صبح و شام
یار کے دم سے سلامت زندگی !
ورنہ واصؔف ہَے قیامت زندگی