درختوں پہ ہریالی آئی کہاں سے

درختوں پہ ہریالی آئی کہاں سے

نظر آئے صحرا میں پودے جواں سے

---

یہ سبزہ زمیں پر، یہ دریا میں پانی

ذرا سوچو لوگو! یہ آئے کہاں سے

---

زمیں گھومتی ہے یہ کس کی لگن میں

ثنا کس کی کرتی ہے اپنی زباں سے

---

نشانی ہے کس کی، جو پودے ہیں خود رو

لگائے ہیں کانٹوں میں گل بھی جواں سے

---

کرم سے اُسی کے یہ سانسیں رواں ہیں

کہاں کوئی باہر ہے اُس کی اماں سے

---

یہ حمدِ خدا سب سے افضل ہے بے شک

پکارے فرشتے سبھی آسماں سے

---

ہو توصیف رب کی یہ ممکن نہیں ہے

سُنی حمد اعلا نبیﷺ کی زباں سے

---

جو طاعت میں رب کی ہمیشہ رہا ہے

وہی سرخ رو ہوکے گزرا جہاں سے

---

ہوئے خواب محفوظ سارے فرشتے

حرم جھوم اٹھا بلالی اذاں سے

---

مواجہ پہ اُن کے کھڑا رورہا ہوں

کہا میں نے کچھ بھی نہ اپنی زباں سے

---

یہ دورِ خزاں ہوگا رخصت تو اِک دن

بہاریں پھر آئیں گی اِک دن وہاں سے

---

کریں غور طاہرؔ ذرا موسموں پر

سبق ہم کو ملتا ہے دورِ خزاں سے