الہی حمد کہنے کا ہنر دے
قلم کو قوتِ حرفِ گہر دے
مرا شیوہ بنا دے عاجزی کو
خشیت، ذوقِ گریہ، چشمِ تر دے
ترے محبوبؐ کا دربار دیکھیں
ہمیں اِذنِ سفر زادِ سفر دے
مٹادے ہر نشاں فصلِ خزاں کا
دلِ ویران کو برگ و ثمر دے
خطائوں لغزشوں سے درگزر کر
ہمیں اعمالِ صالح کا ہنر دے
وَلَد کر دے عطا تو لا وَلَد کو
سبھی کی جھولیاں خوشیوں سے بھر دے
مری اولاد کو دے ہر بھلائی
وفا ، حسنِ عمل ، حسنِ نظر دے
رہیں آباد سب کی مائیں بہنیں
کنواری بیٹیوں کو نیک بَر دے
مرے ماں باپ کی بخشش ہو یاربّ
انہیں فردوس کے شام و سحر دے
شاعر کا نام :- اشفاق احمد غوری
کتاب کا نام :- صراطِ خلد