لبِ گویا کو وہ معراج عطا ہو یا رب

لبِ گویا کو وہ معراج عطا ہو یا رب

اُنؐ کی تعریف کروں تیری ثنا ہو یا رب

---

جن کی توصیف پہ شاہد ہے ترا اپنا کلام

اُنؐ کی توصیف کا حق مجھ سے ادا ہو یا رب!

---

بیخودی میں وہ نہ کہہ دوں جو نہیں کہنا ہے

شوق کو حفظِ مراتب کا پتہ ہو یا رب

---

نسبتِ خاص تو حاصل ہے کرم سے تیرے

ہم کو آقاؐ کی محبّت بھی عطا ہو یا رب

---

تُجھ کو جب سجدہ کروں اے مرے تنہا معبود

اُنؐ کا ہی نقشِ جبیں قبلہ نما ہو یا رب

---

یاد آتے ہیں معاصی تو لرز اٹھتا ہوں

وہ شفاعت پہ نہ راضی ہوں تو کیا ہو یا رب

---

اک تمنّا ہے جسے تیرا کرم ہے درکار

جس سے تو خوش ہے وہ مُجھ سے نہ خفا ہو یا رب