مینوں چڑھیا رنگ توحید دا
میں غلام خواجہ فرِید دا
مکھڑا غلام فرید دا
چہرا غلام فرید دا
نُسخہ کلام مجید دا
میں غلام خواجہ فرید دا
میرے ہتھ چہ جام فرید دا
مِرے لب تے نام فرید دا
مِرا دل مقام فرید دا
میں غلام خواجہ فرید دا
مِرا ذوق شوق مِری لگن
مِرا درد سوز تڑپ جلن
صدقہ غلام فرید دا
میں غلام خواجہ فرید دا
نہ خبر قیام قعود دی
نہ سلام دی نہ سجود دی
مینوں نشّہ یار دی دید دا
میں غلام خواجہ فرید دا
جویں فرق غیب حضور وچہ
جویں فرق عرش تے طور وچہ
ایہنویں فرق وید شنید دا
میں غلام خواجہ فرید دا
اعظؔم نہ وصل دی آرزو
نہ کسے دا ہجر نہ جستجو
گیا غم قریب بعید دا
میں غلام خواجہ فرید دا
شاعر کا نام :- محمد اعظم چشتی
کتاب کا نام :- کلیاتِ اعظم چشتی